Ua tuuaia nei e le vaega faaupufai a le National le Matagaluega o Tagata Pasefika ona o nisi o tupe faaalu e aofia ai se taumafaga o se malutaeao ina ua mae’a le tala faatatau o le tupe i le masina o Me.
O loo lipotia i le One News se faamatalaga a le National e faapea o tali a le malo na tuuina atu i ni fesili tusitusia i le Palemene o loo iloa ai na faaalu e le Matagaluega lea le toeitiiti 53 afe i le taumafaga o se malutaeao lea e pei ona ta’ua.
Ua alia’e mai nei tuuaiga ae lei leva foi ona tuuaia e le Komesina mo auaunaga lautele, public service commissioner o Peter Hughes le matagaluega lava lea i le masina talu ai i le faaalu o le silia ma le 40 afe i se faamavaega na faia ma le latou Ofisa Sili na iai i lea taimi.
Saunoa le sooupu o le National, Simeon Brown ua tatau i le taitai o le Leipa, Chris Hipkins ona faamanino pe faapefea ona mafai ona faaauau pea le faaaluina o lea vaegatupe tele ae o loo faia le suesuega i le faamavaega sa faia talu ai.
O loo faatalia se tali a le Leipa i tuuaiga a le National.
