Ua toe tolopo atu le mataupu faasaga i le tamā ia Soo’au Vaa ma lona faletua ia Maylynn i le vaiaso fou e toe valaau ai i le Faamasinoga Faaitumalo i Mulinuu.
O le taeao ananafi na faasee ese ai le tamaitai loia sa tauavea le mataupu, le susuga ia Muriel Lui o lē sa sui atu i le tamaitai o Mauga Precious Chang sa tulai mo le ulugalii ua molia.
O le ala o le faasee ese ona o nisi o tagata o loo ia tauaveina a latou mataupu lea o loo faasaga iai tuuaiga a Soo’au ma lona faletua.
E silia i le 300 moliaga o loo molia ai i laua nei ma o moliaga e iai le faia o upu taufaamata’u, o upu taufaifai, o le taufaaleaga e faaaogā ai auala o faasalalauga.
E lei tuuina atu se tali a i laua i moliaga a leoleo, ae ua faailoa ananafi o le a tulai le tamaitai loia ia Tanya Toailoa mo lea ulugalii.
Sa talosaga le itu a leoleo mo se lua vaiaso e tolopo ai le mataupu ma faailoa ai nisi o moliaga e toe teuteu, peitai na faatonuina e le alii faamasino ia Raymond Schuster ina ia teuteu i le taimi nei, ae afai e iai nisi moliaga fou ia logo atu le tamaitai loia o le a tulai mo le ulugalii, ma o lea tulaga e lē tau manaomia ai se lua vaiaso e tolopo ai.
