Tusia : Maina. Misa Foma’i – Vai
Ua toe tolopo atu le mataupu e faatatau i le tagi a le Ta’ita’i o le Itu Agai ia Tuilaepa Lupesoliai Sailele Malielegaoi faapea Lealailepule Rimoni Aiafi e faia i le aso 8 o Aokuso o le tausaga nei. O le asō sa tolaulauina ai lea mataupu i luma o lana Afioga i le Faamasino Sili, Afioga Satiu Simativa Perese ina ua maua le talosaga faavavevave a le itu tagi e tauala i le alii loia ia Aumua Ming Leung Wai o loo tulai mo i laua, ina ia mafai ona faanatinati le taualumaga a le Faamasinoga ona o loo ua talanoaina le tala o le tupe i le Palemene i le taimi nei.
ēO le manatu o le itu tagi ua lē talafeagai lea ona o le a leai se leo o itumalo e lua o loo tutula’i mai ai i laua ia i le tala o le Tupe o loo faagasolo talanoaga ma galuega a le Palemene iai. O loo tagi Tuilaepa ma Lealailepule e faapea ua aafia o la aiātatau faavae i le faamālōlō o i laua mai le Palemene ma e lē faatulafonoina le faamālōlōina o i laua. O loo finau atu le itu tali, o loo tula’i ai le Afioga Taulapapa Brenda Heather Latu mo le Fofoga Fetalai e faapea e lē mafai ona toe iloilo le faai’uga a le Palemene ua faamālōlō lē tumau ai i laua ia. Atoa ai ma le tulaga e lē aiāina e le Faamasinoga le faai’uga ua faia e le Palemene e pei ona iai le Intervention Policy.
O loo faapea mai foi le tamaitai loia e tatau ona saili uma mai mau ma mea moni i le mataupu lenei. Ae i le finauga a le alii loia mo le itu tagi o loo ia faapea mai ai afai e aafia aiātatau e i le Faamasinoga le aiā e aapa ai i mataupu faapea. Ua lē o talia foi le talosaga e faatelevave le mataupu, ina ua taga’i le Faamasinoga i mataupu ua faatula’i atu e le tamaitai loia ia Taulapapa.
O le faamatalaga a Taulapapa talu ai ona o i latou o loo aafia i le mataupu lenei o loo tuatuagia i le fono a le Palemene e pei o le Loia Sili a le Malo, e lē mafai ai ona auai mai, atoa ai ma le tulaga o le mataupu lenei e tatau ai ona matuā saili mai mau ma mea moni e oo lava i faamaumauga o le Palemene (hansard). O le ala lea na tuu mai ai le avanoa e le Faamasinoga, ma tuuina atu ai le 2 vaiaso i le Itu tali e tapena mai ai mo iloiloga, lea la ua aumai ai manino le aso 6 o Iulai e tatau ona faila atu ai le tali a le Fofoga Fetalai o le Maota i le tagi ua folasia a le itu tagi.
O le aso 13 o Iulai e tatau ona faila atu ai se tali a le Itu tagi e faatatau i se tali o le a tuuina atu e le itu tali. Ua tuuina atu foi le isi vaiaso e tuuina atu ai se tali mai le itu tagi o le aso 27 lea o Iulai, ae o le aso 3 o Aokuso e tatau ai ona faila atu ai finauga faai’u tusitusia a loia o itu uma e lua, a o le’i toe valaauina ai lenei mataupu mo iloiloga a le Faamasinoga i le aso 8 o Aokuso.
