E le’i manumalo le lafo o le lē faatuatuaina a le Itu Agai sa finau ai e faasee ese le ulua’i tamaitai Palemia o le atunuu ma lana taupulega i minisita o lana Kapeneta.
Peitai o lea ua toe tofotofoina i se isi lafo o le lē faatuatuaina le ta’ita’iga a le afioga i le Sa’o Faapito le afioga Fiame Naomi Mataafa, mai totonu lava o le lotoifale o le faafaletui o se vaega to’atele o sui faipule o le vaega faaupufai o le Faatuatua i le Atua Samoa ua Tasi.
O lea ua faailoa aloa’ia e le ta’ita’i o lea vaega faaupufai le susuga Laauli Leuatea Polataivao Fosi Schmidt, le tuuina atu i le Palemene i le vaiaso nei o le latou lafo o le lē faatuatuaina e aveese ai le tofi Palemia o le sui faipule tamaitai o Lotofaga.
Le susuga Laauli Leuatea Polataivao Fosi Schmidt i le feiloa’iga ma tusitala i le faai’uga o le vaiaso.
Mo le silafia e tatau ona maua le numela fulisia o nofoa e 53 o le paea’iga a le Palemene o iai nei e manumalo ai se lafo o le lē faatuatuaina.
O se feiloa’iga a tusitala ma le ta’ita’i o le Itu Agai le susuga a Tuilaepa Lupesoliai Sailele Malielegaoi na faailoa ai e Tuilaepa le taumafai atu o nisi o faipule o le Faatuatua i le Atua Samoa ua Tasi e sa’ili le lagolago mai faipule o le Itu Agai i le latou lafo o le lē faatuatuaina.
Ae e pei ona silafia o le lafo o le lē faatuatuaina a le Itu Agai i le mau lava e tasi e aveese le tofi Palemia o le afioga Fiame Naomi Mataafa ma lana Kapeneta, e leai se lagolago mai le itu a le malo auā na palota tetee uma le Kapeneta e 15 faipule o iai ma le 20 o faipule o le Faatuatua i le Atua Samoa ua Tasi.
O le a tatou iloa i le palota o le lē faatuatuaina a le itu a le malo pe lagolago iai pe leai faipule e to’aiva o loo i le Kapeneta lea o loo faitau i le 29 o i latou ua lagolagoina le ta’ita’iga o le latou pati e pei ona filifilia iai le faipule o Gagaifomauga 3.
Afai ae taunuu le palota o le lē faatuatuaina e aveesea ai le Palemia ma lana Kapeneta, o se matati’a lea o le a faamauina i talafaasolopito o upufai o le malo o Samoa, e lē gata o se ulua’i tamaitai ua avea ma Palemia, ae o se ulua’i ta’ita’i foi o le malo o Samoa ua lua ni palota o le lē faatuatuaina e faamuta ai lana ta’ita’iga e pei ona sa taumafai iai le Itu Agai ae sa lē manuia.
O le a tatou mata’itū poo fea o le a aga’i iai le lagolago ma le teena o lea lafo e faipule o le Faatuatua i le Atua Samoa ua Tasi, ae o le a tatou mata’itū foi pe lagolago pe teena e le itu faaupufai o loo agaia le malo.
Ua uma ona faailoa e le tamaitai Palemia i le Maota Fono i le tauaofiaga amata a le fono usu o lenei tausaga, a faia’ina le malo i se tulaga o le lē faatuatuaina, o le tali o le toe foi i le atunuu e sa’ili mai ni o latou sui mo le Palemene e ala i se faigapalota tele.
