Ua toe to’ia le laulau o fuafuaga a le malo mo le atina’e o le tamaoaiga o le atunuu e se isi siaki o meaalofa mai tupe faasili poo dividend a faalapotopotoga tuma’oti a le malo o loo faagaioia faapisinisi.
O le pulega o uafu ma taulaga poo le Samoa Ports Authority ua ia tauaao i le minisita o faalapotopotoga tuma’oti uma a le malo le siaki e 3 tesimale 5 miliona tala, o se tupe lea mai polofiti poo tupe faasili na maua e lea pulega mai ana galuega o le tausaga faaletupe 2023 i le 2024.
O le Minisita o Fela’uaiga ma Galuega tetele le tofa Olo Afoa Fiti Vaai, o loo vaaia le pulega o uafu ma taulaga sa ia tauaao lea siaki tupe i le faai’uga o le vaiaso na te’a nei, i le mae’a ona ia tauaao le isi tupe faasili e 2 tesimale 4 miliona a le pulega o malaevaalele o loo i lalo foi o lana vaaiga.
O aiaiga o le tulafono o loo pulea ai faalapotopotoga tuma’oti a le malo e faagaioia faapisinisi e tatau ona latou tuuina atu ni tupe faasili poo meaalofa lea e ta’ua o le dividend mo galuega a le malo, pe a mae’a ona faamaopoopo a latou seleni i le mae’a o tausaga faaletupe.
O ia seleni o tupe faasili o loo lagolago ma fesoasoani i le faasoa a le malo i fuafuaga eseese o galuega o le atina’e o le tamaoaiga o Samoa, ma e masani ona ave ia tupe faasili i totonu o fuafuaga tau tupe a le malo e tapena ai ana tala o le tupe autū mo tausaga faaletupe ta’itasi.
