O Ianuari e toe amata ai feoaiga saoloto i le va o Niu Sila ma le Atu Kuki
O le faasilasilaga lea mai le faigamalo a le Atu Kuki i le faaiuga o le vaiaso, ma afai ae taunuu o lona uiga e pau lea o le atunuu o le a saoloto ai le feoai atu i fafo o tagata Kiwi aunoa ma le tau faanofoesea
Peitai, e le o atoa lea tala fiafia ona e le o talia le feoai o fanau i lalo o le 12 tausaga seiloga e faia tui o le 5-11 tausaga le matutua
I fuafuaga o loo iai ma o loo fua lava foi i le tulaga o loo iai le Koviti i le Atu Kuki, o le a faatumauina pea le tatau ona faia o siaki ae e le’i tuua ma toe taunuu i Niu Sila, ae o le a le moomia le toe faia o se isi siaki pe a taunuu i le Atu Kuki
O le masina o me sau ai ia Aukuso o le tausaga nei lea na toe tatala ai le feoai saoloto i le va o atunuu e lua, peitai o le sau o le Delta lea na toe taofia ai
O le Atu Kuki e le i iai lava sana case faamaonia o le Koviti, ma o le atoaga o tala i lea fuafuaga o le a faailoa e le vaega o turisi a le Atu Kuki i vaiaso o i luma
O le aso 14 o Ianuari 2022 lea o loo fuafua e amata ai lea saolotoga
