I le fa tausaga o toso e le Malo le filifili na loka ai le toe ave o ana faasalalauga faapisinisi e pei o le faasalalauina o avanoa faigaluega i tautua tuma’oti o faasalalauga e pei o nusipepa, o lea ua faailoa e le Minisita o Pisinisi Alamanuia ma Leipa, ua ia aveese lea taofiga sa iai mai le taimi o le faigamalo sa iai.
O lea taofiga sa unaia ai matagaluega ma faalapotopotoga a le Malo e faaaoga a latou fesootaiga tekenolosi i upega tafailagi poo websites, o nisi o a latou itulau i luga o le api o foliga e faasalalau ai a latou tautua faapisinisi e pei o avanoa faigaluega, ma tauofoga ma isi auaunaga e tatau ona silafia e le atunuu.
O se faiga faavae na mafua ona o le faasaoina o tupe faaalu a le Malo i faasalalauga e le gata mo faletelevise ma le leitio, ae faapea i nusipepa.
O le toe matala o lea taofiga e iai le talitonuga o le a toe faaauau ai tulaga masani sa iai i le tele o tausaga ua tuanai, o le tafe atu o seleni a le malo i pisinisi tau faasalalauga tuma’oti.
