Na faateia le toatele i le vaiaso na tea nei ina ua toe sui le finagalo o le sui tauva a le vaega faaupufai e Puipuia Aiā Tatau o Tagata HRPP le susuga ia Laufou Alofipo Faamanu Manase ina ia faaauau le mataupu o le tagi o faigapalota i luma o le faamasinoga maualuga.
O le 2 vaiaso talu ai na faailoa ai le ave i tua o le tagi a Laufou faia faasaga ia Tuala Tevaga Iosefo Ponifasio, o lē sa tauva o se sui tutoatasi mulimuli ane ia filifilia le Vaega faaupufai a le FAST e galue ai e na te tauave le tofi mo le Itumalo Gagaemauga No.1, na ave ai foi i tua le tagi a Tuala na faia faasaga ia Laufou. Peitai o lea ua toe talosaga Laufou e toe faaauau le mataupu ma sui ai ma lana loia.
Ua faatonuina ai foi e le Faamasino Sili Satiu Simativa Perese le susuga Laufou ina ia saili sana Loia ma tolopo ai le mataupu mo le Aso Lulu 21 o Iulai 2021 mo le fofogaina.
I nisi o faatalatalanoaga ma le susuga Laufou ina ua maea le faamasinoga i le 2 vaiaso talu ai na ia taua ai “o le agaga lava o le Atua ua fai ai lenei faaiuga aua na tatalo mai foi si o matou itumalo ma si o matou nuu o Saleaula. E fai aso le Atua ma o le agaga ma le faamoemoe ia tatou faia measili e manuia ai Samoa”. Peitai e ese le iuga o lea ua oo iai finauga mo le nofoa o Gagaemauga No.1.
O le taimi nei o loo tulai mai le aofaiga o faipule filifilia FAST 26, HRPP 17 ae lua mataupu lea o le a toe faaauau nei, e aofia ai le tagi o le faigapalota mo Sagaga No.4 lea e le’i talia e le faamasinoga e faamavae ai o Tuisa Tasi Patea ae toe foi e fai le faigapalota. Ae le gata i lea o le mataupu a Gagaemauga No.1 lea ua toe suia ai le finagalo o le sui tauva ia Laufou Alofipo Manase ina ia faaauau pea le la faamasinoga ma le afioga ia Tuala Tevaga Iosefo Ponifasio.
