Ua ofi atu nei le faalapotopotoga o le augaosi oloa i totonu o le atunuu le Samoa Manufacturers Association, i le faalapotopotoga a le aufaipisinisi i lo tatou atunuu le Samoa Chamber of Commerce, ma ua faatasia uma ai kamupani ma pisinisi tuma’oti i se aiga e tasi, e galulue mo le siitia o a latou tautua ma auaunaga, i le sini autu ia manuia le tamaoaiga o Samoa.

O le fono faaletausaga a le faalapotopotoga o le aufaipisinisi i le Aso Lua o le vaiaso nei sa usuia i le faletalimalo o le Taumeasina Resort na faamautu aloaia ai le avea o le faalapotopotoga o le augaosioloa a Samoa ma sui auai o le aufaipisinisi, ma faailoa ai e lo latou peresetene le tāua o lea laasaga, auā ua maua ai le autasiga i se mafutaga e soosoo tau’au ai i le faaleleia o pisinisi mo tupe maua, ae o le itu sili o le sao i le atiina a’e o le tamaoaiga o Samoa.

Na taualuga le fono i le filifilia o tofi o le faalapotopotoga o le aufaipisinisi a le atunuu lea ua toe filifilia ai le tamaitai le afioga Seulupe Michelle Meredith i le nofoa o le Peresetene, ae sui peresetene le tofa Faasootauloa Sam Saili. O isi tofiga o le teuoloa o Tom Hogarth, failautusi o Nadia Meredith Hunt, ma sui o le komiti faafoe le afioga Fuimaono Hugo Betham, Tofilau Fiti Leung Wai, ma Enele Westerlund.