O loo faaauau pea su’esu’ega a leoleo i le nakoti o le aisa 10 kilokalama lea na maua ise pusa poo se container e ala i le faaaogāina o le masini fā’ata le Xray scanner ma ta’ifau sosogi a leoleo, peitai e le’i va i se aso talu ona maua ia aisa ae faailoa e le matagaluega o tiute ma tupe maua, se isi nakoti na maua foi e le masini fā’ata.
O se tagapepa iila o loo fafao ai laau faasāina le maruana e tusa le mamafa ma le 214 grams poo kalama lona mamafa.
E lē o faailoaina e le matagaluega pe na faapefea ona aumai lea tagapepa maruana ae poo ua iai foi se isi poo nisi ua masalomia, peitai o le tasi lea o nakoti na faaulufale faasolitulafono mai ua ave i leoleo mo a latou su’esu’ega.
Ua faailoa e le Ofisa Sili o lea matagaluega le afioga Fonoti Talaitupu Li’a Taefu o le faaauau ona maua o ia nakoti o le ata manino lea o le tuu atoa o le tomai ma le silafia o le ofisa o le tiute e faatino le latou auaunaga i le mea silisili ona oo iai le silafia ina ia taofia le oo atu i le lautele o le atunuu o ia pauta ma laau faasāina.
