O lea ua toe foi tagata e nonofo i le fale tele e valu ona fogafale i Newmarket i Aukilani lea na mu ananafi.
O le mu lenei na tapunia faafuasei ai ma le train station i Newmarket mo nai itula ma na aafia ai ma feoaiga a le toatele i le taulaga ananafi.
Mai le aoauli na aveesea faamalosi mai ai i latou e nonofo i apartments nei, o lea faatoa toe faataga anapo i le mae’a ai o galuega a le ofisa o tineimu aemaise o suesuega e faamautinoa ai ua malu atoa le fale i le nofo.
O le basement o le fale lea na amata mai ai le mu ma e ui e lei faigofie galuega ananafi ona o le taumafai e aumai uma i fafo tagata, ae faafetaia e leai se isi na aafia ai.
