Ua tuu avanoa le faamasinoga i se alii 29 tausaga le matua, o ia lea o Gerald Leota o Faleasiu ma Fasitoo uta. Ua le faia iai se faasalaga faafalepuipui, ae ua nofo vaavaaia mo le umi e 18 masina ma faatonu e na te faia ni galuega lelei mo tagata lautele mo le 200 itula.

E fa masina o nofo taofia Gerald i le vaaiga a leoleo ma ua faaalia i le faaiuga a le afioga i le faamasino sinia o le faamasinoga maualuga, ua lava lea e fai ma ona faasalaga ina ua ia ioe i moliaga solitulafono o le umia o le pauta faasaina o le ‘aisa, umia ose paipa e ula ai lea ituaiga o pauta faasaina, ma lona lafo o ni upu tau faamata’u i lona toalua faaipoipo.

Ua toe foi i Ausetalia le avā a lē ua molia ma lana tautinoga i le faamasinoga e le toe faaauauina le la ulugalii, ona ua tele ona mafatiaga tau tupe ona o lea faatoa ia iloa ina ua o mai i Samoa, o tupe o loo faatau ai e lona toalua pauta faasaina e faamalie ai lona manao. O le faaiuga a le faamasino sinia le afioga Vui Clarence Nelson, ia le tuuina atu lē ua molia i le falepuipui ona e talitonu le faamasinoga e mafai e Gerald ona alu ese mai ana uo o loo mafua ai ona aafia i le faaaogaina o pauta faasaina.

E fitu afe tala le sala tupe a lē ua molia na totogi e lona aiga i le togisala le nuu. O faamaumauga a leoleo o loo faailoa ai o le aso 27 o Fepuari o le tausaga nei na faamautu ai lē ua molia ma lona toalua i le faletalimalo o le Mapusaga River side apartment i Tulaele. O le nofoaga lea na fai ai lē ua molia i lona toalua e avatu se selau tala, o se 200 ma se 300 tala.

O le taimi muamua na alu ese ai ma le nofoaga lē ua molia, na faatoa toe foi atu i le aso na sosoo ai. Faaalia e leoleo o le tasi o aso na vaaia ai e le toalua o lē ua molia le pauta o le ‘aisa o loo ula e lona toalua e faaaoga ai se fasi paipa uga.

O le faaauau ona tapa e le ua molia le fafine e avatu se tupe ma ia lafo ai i se tasi o aso ni upu tau faamata’u na vili ai loa e le tina leoleo. Na taunuu malu o le Malo ma faia sailiga ma maua ai i le taavale se vaega o le pauta faasaina o le aisa ma le paipa na faaaoga e ula ai. Na ioe uma Gerald i moliaga a leoleo.

Faaalia e le faamasino sinia i lana faaiuga ua toalua ia Gerald tagata ua le faasalaina e le faamasinoga ile falepuipui ona o le umia o le ‘aisa. O le faasalaga maualuga o lea solitulafono o le solo atoa i le falepuipui pe a faamaonia.