Ua mae’a le fono faaletausaga a le ofisa o le saogalemu o auaunaga tau vaalele a le Pasefika, lea e ta’u faapuupuu o le PASO poo le Pacific Aviation Safety Office sa usuia i le atunuu o Vanuatu, ma ua toe tusi aao ai le fono faatonu e faaauau pea Samoa i le tofiga ta’ita’ifono lea ua toe seei ai le Ofisa Sili o le Pulega o le Matagaluega o Fela’ua’iga ma Galuega Tetele le afioga Fui Tupa’i Mau Simanu.
O le ofisa o le saogalemu o auaunaga tau vaalele i le Pasefika ua avea ai foi se isi tamalii o le atunuu ma faauluuluga le afioga Silimana’i Ueta Solomona, sa avea ma Ofisa Sili o le Pulega o malaevaalele a le atunuu.
O lea ofisa o loo feagai ma mataupu tau tulafono o le saogalemu o vaalele sa faatūina e le fono a ta’ita’i o Malo o le Pasefika, ma o ona sui auai o atunuu e pei o le Atu Kuki, Kilipati, Nauru, Niue, Papua Niu Kini, Vanuatu, Tuvalu, Tonga, Solomona ma Samoa.
O ona sui lagolago o atunuu o Ausetalia, Fiti, ma Niu Sila.
O le ofisa o le PASO o loo i le taulaga ma le aai tele o Port Villa le laumua o le atunuu o Vanuatu.
