Ua toe iloilo e le Immigration a Niu Sila le auala fou o loo faafoe ai visa faigaluega i le mae’a faaalia ai o le lē fiafia ma faitio fale faigaluega. 

E latalata i le 30,000 avanoa faigaluega o loo taumafai pulega o fale faigaluega e saili nisi, peitai e silia ma le 5 vaiaso talu ona tatala avanoa mo talosaga ua ta’ua o accredited employer work ae na o le 21 visa ua maua po ua talia. 

Ua sau ai foi ma molimau e lē faigofie le auala o loo faatalosagaina ai nei visa online. 

A tuu mai foi i le taimi e faatali ai pe a valaau le telefoni, e latalata i le itula o faatali. 

Ae i se tali mai a le sui o le pulega a le Immigration, o le accredited employer work visa e fou ma e lē gata foi la o loo tau a’oa’o fale faigaluega o loo faatalosaga i le tekonolosi fou ae faapea foi le aufaigaluega. 

O le sitepu muamua na tatala ia Me, o le tele o talosaga ua talia, peitai o le sitepu lona lua lea faato’ā tatala ia Iuni lea sa tatau ona faamae’a i totonu o le 10 aso lea o loo poloka ona o le faaletonu o masini. 

A o tau toe fetuuna’i ai le system a le Immigration, i le taimi nei o lea ua fai lava le laina telefoni faapitoa mo ia talosaga atoa ai ma le taumafai o le aufaigaluega e faafesoota’i i le telefoni e ana talosaga e lē o atoa, suia mai ai mai fesoota’iga online na mua’i faalagolago tasi iai.