A itiiti mai e tasi tesimale tolu miliona ($1.3miliona) tala le aofaiga o se tupe ua toe tuuaia ai e leoleo i se moliaga faaopoopo, se tamaitai sa galue i le faletupe o le ANZ i Apia, e ese mai i isi moliaga o loo tuuaia ai i se isi aofaiga o tupe e 80 afe na aafia i sana gaioiga solitulafono a o galue ai i lea faletupe.
O le amataga o lenei vaiaso na toe tulai ai Seira Malifa i le faamasinoga lea na talosagaina ai e loia a leoleo le faataatia o le lauina o se faaiuga mo isi moliaga ua ioe iai lē ua molia, ona e iai le moliaga faaopoopo.
Ua talia e le faamasinoga le tuuina atu o le lua vaiaso i leoleo e tapena ma tuuina atu ai le moliaga faaopoopo lea e aafia ai se vaegatupe e miliona 3 selau afe tala.
