E toalua tagata faigaluega o le kamupani vaalele o le Samoa Airways, ua la toe togitogi i le kamupani le 4 afe tala, poo le 1,500 tupe Amerika ua mae’a totogi e le Samoa Airways o lana sala i le faigamalo a Amerika Samoa.
E toalua ni tagata malaga na tauave e le Samoa Airways i ni ana malaga agai i le teritori e aunoa ma pepa e mafai ai ona ulufale i Amerika Samoa poo pemita.
Ua faailoa e le Pule Sili o le kamupani vaalele le afioga Fauoo Fatu Tielu i le vaega faasalalau o le Samoa Global, e tasi le tausaga ua tuu atu e le Samoa Airways i ia tagata faigaluega e toalua e toe faaola ai seleni a le kamupani vaalele ua faaalu i le totogiina o le sala e mafua i lo la faatamala.
E pei ona silafia o le tasi o pasese na tauave e le kamupani vaalele i se tasi o ana malaga agai i le teritori e aunoa ma se pemita ulufale, o le sui faipule o le Palemene ua faamuta lona tofi Minisita lagolago.
O aafiaga o tagata faigaluega e toalua ua la toe totogi i le kaupani vaalele seleni ua totogi ai le sala tupe, na toe faia ai ni aoaoga mo le aufaigaluega o loo gafa ma le taulimaina o pasese ina ia toe faamanatu iai aiaiga o tulafono tau femalagaa’iga ma malamalama iai.
