O le taimi o le vātau o tagata Samoa i le tausaga e 1888 na aveesea faasolitulafono ai e fitafita Siamani sa iai i le atunuu i lena vaitau, le vaega tāua pito i luma o le vaatau anamua o le atunuu e ta’ua o le taumualua.
Ua 136 ai nei tausaga talu mai le 1888 ae o lea ua toe faafoi mai i lo tatou atunuu lea vaega tāua o a tatou talafaasolopito, poo se measina o se pine faamau o a tatou tu ma aganuu.
O le afiafi o le Aso Lulu le ogatotonu o lenei vaiaso o le a faia ai i le Iunivesite Aoao o Samoa i lona laumua le Papaigalagala se sauniga e tauaao aloaia mai ai i le Malo ma tagata uma o Samoa e le Minisita o le va i fafo o le Malo o Siamani lea vaega o le vaatau anamua o Samoa le taumualua.
O le sauniga foi lea o le a tuuina atu ai i lo tatou Malo le lipoti e faatatau i le falepuipui tuai i Vaimea sa fausia i taimi o pulega a Siamani, lea o loo iai pea se vaega o fale o fausaga tuai o lea falepuipui i Vaimea i le lotoā a le Malo o loo iai.
O le nofoaga tutotonu o aoaoga o tu ma aganuu faapea le Gagana Samoa a le Iunivesite Aoao a le atunuu o loo taulamua i le tapenaina o ia galuega e lua e pei ona o le a faatino i le ogatotonu o lenei vaiaso.
