Ua maua le avanoa o Samoa i se polokalame a le faalapotopotoga o taumafa a le lalolagi le F.A.O. e autū i le toe atina’eina o fua tau faatoaga mo le faateleina o taumafa, ae mafai ai foi ona faateleina le maua pea mo le faamoemoe e faatau i maketi i fafo.
E tolu fua tau faatoaga ua amata ai lea fuafuaga e aofia ai le koko, niu, ma le talo.
Faaalia e se Ofisa Sili lagolago o le matagaluega o faatoaga ma faigafaiva o loo gafa ma auaunaga i faiga faavae a lea matagaluega, o le masina o Iuni o le tausaga nei na maua ai lea avanoa o Samoa ma amata ai lona ona faataatia lana fuafuaga e pei ona amata i ia fua tau faatoaga.
O loo faamoemoe e tuuina atu lea fuafuaga i le fono faapitoa a le faalapotopotoga o taumafa a le lalolagi e faia i le masina o Oketopa i Roma i le atunuu o Italia.
O le Minisita o faatoaga ma faigafaiva o le a ia folasia le fuafuaga i lea fonotaga faapitoa.
Le Ofisa Sili lagolago o le vaega o auaunaga tau faiga faavae a le matagaluega o faatoaga ma faigafaiva ma le faamalamalamaina o le avanoa ua maua e Samoa i le polokalame a le faalapotopotoga o taumafa a le lalolagi.
O loo matala pea le faitotoa mo Samoa e faaofi atu ai faigafaiva ma lafumanu i lea polokalame tāua.
