Ua amata le tausaga i le toe tumutumu ai o le paka kirikiti i Otara i taeao o Aso Toonai i le mamalu o le atunuu o loo auai a latou aukirikiti i le taamilosaga a le PIMKA.
O le taamilosaga e toe maua ai le mafutaga fealofani a tupulaga o le atunuu o loo fiafia i lenei taaloga o le kirikiti ae le gata i lea o le toe faaolaola pea lea o le taaloga a le atunuu e pei ona masani mai ai i aso ua mavae.
O le taeao o le Aso Toonai ua mavae, na toe vaaia ai le tele o fale’ie a nuu, mafutaga ma ekalesia i lea malae e toe tatala aloaia ai le taamilosaga i lenei tausaga.
O le susuga i le faafeagaiga ia Rev Eperone Futi o le ekalesia EFKS Tamaki sa fai ma ositaulaga i lea taeao auā se upu faamalosiau mo ‘au taitasi.
Na saunoa le susuga a le faafeagaiga, soo se ‘au lava e iai le taitai, ma o le luitau ma le faamalosiau mo ‘au uma ua auai, e tatau ona iai ni taitai e toa le loto, ma e mafai ona galulue faatasi ma tutu faatasi.
Auā e palaai loa le taitai o lona uiga e palaaai foi le ‘au atoa.
O se faamalosiau na toe matimati ai le amataga o le taamilosaga o le PIMKA i lenei tausaga i ‘au uma sa auai.
E 12 ‘au a alii o loo iai i le taamilosaga, e aofia ai i le Pool A, Transformer, Ao o Atua, Wolfpack, Feiloaiga ma Uso, Liona, ma le Povi Poa.
Pool B – Laulaau mai Farani, Finau Taumafai, Taeao Lagimama, Kobra, 33 Uso ma le Happy Boys.
E lima ‘au a tamaitai e aofia ai Ao o Atua, 33 Taimane, 101 Movement, GI Katoliko ma le Nifoloa.
Iuga o taaloga i le Aso Toonai muamua
POOL A:
- Transformer faia’ina i le Povi Poa
- Ao o Atua manumalo i le Liona
- Woolfpack manumalo i le Feiloaiga ma Uso
POOL B:
- Laulaau mai Farani faia’ina i le Happy Boys
- Finau Taumafai tutusa ma le 33 Uso
- Taeao Lagimama faia’ina i le Kobra
POOL A:
- Povi Poa manumalo i le Ao o Atua
- Liona manumalo i le Feiloaiga ma Uso
- Wolfpack manumalo i le Transformer
POOL B:
- Happy Boys manumalo i le Finau Taumafai
- 33 Uso faia’ina i le Kobra
- Taeao Lagimama manumalo i le Laulaau mai Farani
‘Au a Tamaitai
- Ao o Atua manumalo i le Nifoloa
- 101 Movement manumalo i le 33 Taimane
- GI Katoliko manumalo i le Nifoloa
- 101 Movement manumalo i le Ao o Atua
- 33 Taimane manumalo i le Nifoloa
