O loo tuli faasalaga i le falepuipui o ni alii talavou ua faamaonia lo la faia o ni auala taufaavalea i galuega faavaitaimi i le tapa o tupe mai tagata ma le faamatalaga o laua o loo faia feuiuiaiga e saili ai tagata e maua ia avanoa faigaluega.
Peitai e lei mamao atu ni tausaga na aliali ai ia faiga solitulafono, ae ua toe aliali mai foi ma ua alu ai tupe ma ave tusifolau o nisi, a o isi ua totogi le tai 500 tala e fai ai tusifolau ma isi tapenaga, ae oo i le aso na folafola atu e malaga ese ai mo Ausetalia, ua toe logo atu ua le taunuu.
Ua faamatala e le tama talavou o Emelio Toalua, na fai faamavaega ma sauni i le malaevaalele i le Aso Tofi na tea nei, peitai na taunuu i le malaevaalele i Faleolo ae maua le feau tusitusia mai se tamaitai o loo tuuaia nei i lona faia o se gaioiga tau faavalea, e malie ua le oo le malaga, ae faatoa o ese i le Aso Sa na tea nei.
O lea tamaitai o lona suafa o loo iloa ai e Emelio ma isi ua mamulu a latou seleni, o Lyn Nauer peitai o loo iai le talitionuga e le o lona suafa ma le faaiu moni lea.
O se faatalanoaga ma le susuga Emelio Toalua. Na fesootai i le Matagaluega o Alamanuia Pisinisi ma Leipa, ma faailoa mai ai e leai se tamaitai faapea e faigaluega i lo latou ofisa o loo faia tapenaga o tagata faigaluega faavaitaimi.
O le fautuaga a le matagaluega ia i latou sa aafia i ia faiga taufaavalea ua tatau ona faato’ai se tagi i leoleo, ina ia vave ona taofia ai le oo atu o ia faiga i nisi tagata o le atunuu.
