O galuega a le komiti o le palola i lenei vaiaso sa iloilo ai talosaga mai le au nofosala i le falepuipui e to’a tolusefulu lua (32).
Ua aofia i lea aofaiga le 11 o talosaga fou ma le 14 o talosaga mai isi iloiloga a le komiti o le palola ua mae’a, sa faataatia e faatoa tagofia i le iloiloga o lenei kuata faaletausaga ua pa’ū tonu i le masina o Setema.
E toaono le au nofosala na suia o latou mafaufau ma toe faaui i tua a latou talosaga, ae toatasi na talosaga ae e lei faamalieina le faaiuga a le komiti i le taimi e tuli o le faasalaga ona agavaa ai lea e talosaga atu mo se iloiloga.
Ua faailoa e le Ofisa Sili o pulega o le matagaluega o faamasinoga ma le faafoeina o mataupu tau faamasinoga, e toavalu pagota ua talia a latou talosaga i le mae’a o iloiloga a le komiti o le palola ae lima talosaga na teena ma o le a tuli faauma le 15 pasene o le faasalaga faafalepuipui o loo totoe ona e iai mafuaaga.
E 15 talosaga ua toe faapafala o le a faatoa iloilo i le isi fono a le komiti o le palola.
E eseese uma solitulafono o pagota sa talosaga e pei o nisi sa faasala ona o moliaga o le faiāiga faamalosi (rape), umia o nakoti poo fualaau ma laau faasāina e pei o le maruana ma le ‘aisa.
O isi o solitulafono o le talepe fale ma le gaoi, ma le lima tagoese a o avea ma tagata faigaluega. E toalua le au nofosala i le moliaga o le fasioti tagata faamoemoeina sa talosaga ai i le 32 o pagota sa aofia i le iloiloga a le komiti o le palola ua mae’a.
