O le isi alii e suafa ia Brandon Wakeham sa taalo i le Bulldogs ma le West Tigers, o ia e atoa iai le toatolu o alii ua feta’ua’ina le molia i le sapalaia o se vaega tele o fualaau faasāina i Sini.
Ua ta’ua i le 9News o Wakeham 25 tausaga na taofia e leoleo i le aso ananafi mai Chester Hill ina ua mae’a sueina e leoleo lana taavale ma maua iai le kilo o le MDMA, 56 kalama o le cocaine ma se vaegatupe pe 50 afe.
E 12 moliaga o feagai ma le alii taalo e aofia ai moliaga e faatatau i laau malosi, sapalaia o fualaau faasāina ma isi.
O le isi alii e 47 tausaga na pueina foi e leoleo ina ua mae’a ona sueina lona fale i San Souci ma maua iai fualaau faasāina ma isi aitema atoa ai ma le pe ā ma le 10 miliona o aseta e iai sootaga ia te ia.
O le isi e atoa iai le toatolu e 25 tausaga foi le matua na pueina i Brookvale ma molia foi i moliaga tau fualaau faasāina ma sueina ai e leoleo se fale i Bexley.
E tutulai i latou uma ia i le faamasinoga i le asō, ma e lē o taliaina talosaga e tatala ai i tua.
Puna o Faamatalaga: https://www.9news.com.au/national/former-nrl-player-brandon-wakeham-arrested-on-drugs-charges/9013e16b-29d7-4597-a8aa-d12e4357437f
