E i le va o le 300 i le 400 le toatele o tagata o lea ua toe fesoota’i iai le Auckland City Mission ona o lole nei ua faamaonia o loo iai i totonu methamphetamine.
O le lipoti lata mai lea o loo iai e oo mai i le taimi e tuufaatasia ai tala o le taeao, e toavalu aiga lea ua mautinoa.
E toatasi le tamaitiiti na taumafaina, peitai na ia luai mai i fafo ona e lei fiafia i le tofo.
Ae i le aufaigaluega a le Auckland City Mission, e toalua sui o le aufaigaluega na tofoina, ma o i laua nei na vaai le foma’i.
I lipoti a leoleo e toatasi le tagata o le aufaigaluega o lea na ave i le falema’i i Aukilani ma ua toe te’a i tua.
O le isi toalua na ave i le falema’i e faapea o le talavou ma le tamaitiiti, ma o loo manuia uma.
O fautuaga mai le Drug Foundation e tusa lava pe na o le tofo toe luai mai i fafo le lole, ae tatau lava ona vave vaai le foma’i.
A o su’esu’e ai pea lole nei ua faamaonia mai e le Auckland City Mission, o le ogatotonu o Iulai lea na faameaalofa atu ai ma o lea ua toe fesoota’i nei i tagata na ave iai food parcels talu mai Iulai.
O le lole e tasi e tusa lea ma le 3 kalama methamphetamine o loo iai, ma a faatusa lea i le dose e tasi o le aisa lea e 10 i le 25 milikalama, o se matuai maualuga tele lea ua faatoluselauina.
O su’esu’ega a leoleo o loo faasolo nei, e lē gata o le saogalemu o tagata lautele, faafefea ona oo i le Auckland City Mission lole, ae pe na faafefea foi ona sao mai i totonu o le atunuu.
Puna o Faamatalaga: https://www.rnz.co.nz/news/national/525129/the-numbers-behind-the-auckland-city-mission-food-parcel-meth-lolly-contamination?fbclid=IwY2xjawEp4OdleHRuA2FlbQIxMAABHTto9b5B_Dq57_9kBt6_iIfLPUAKbO6PmRNUaTXZK_oXa4F4zR9tdmbdoQ_aem_ZyX75CWBsMAvHF6HicKK3A
