Ua iai tulafono ua malupuipuia ai fanauiti a le atunuu mai gaioiga solitulafono e aafia ai lo latou ola tuputupu a’e a o iti o latou tausaga.
Peitai e lē o ‘asa foi mataupu tau solitulafono e molia atu ai i le faamasinoga fanau tama laiti e i lalo o le 16 tausaga le matutua.
O le vaiaso nei e tolu mataupu tau faamasinoga sa tutula’i ai i le Faamasinoga Sili a le atunuu ni fanau tama laiti e lavea i le matutua o le 14 ma le 15 ma ua faia iai le faai’uga e ave o latou moliaga i le Faamasinoga o Tupulaga Talavou, ona e lē mafai e le Faamasinoga Maualuga ona tagofia o latou moliaga ona e laiti o latou tausaga.
O le tasi o i latou ia o loo tuua’ia i le faatama’ia i le afi poo le malaia o ni vaafagota se tolu sa taula i le uafu i Salelologa, o le isi tamaitiiti o loo molia i ni solitulafono tau nakoti e fesoota’i i le pauta faasāina o le ‘aisa, ae o le isi tamaitiiti o loo tuua’ia i ni solitulafono tau faiaiga poo sexual offences.
O le fofogaina o o latou moliaga i le Faamasinoga o Tupulaga Talavou, e lē mafai ai e tusa o aiaiga o lea faamasinoga, ona auai le vasega o tusitala e lipotia ona taualumaga.
O le mafua’aga o le puipui o le faamasinoga ma le tulafono i aafiaga o tupulaga laiti e aafia i soligatulafono.
E tasi se mataupu sa iai le faatagaga a le faamasinoga i ni tausaga ua tuana’i e auai tusitala e lipoti taualumaga o le gaioiga solitulafono na tupu na aafia ai se tamaitiiti i ni tuua’iga o solitulafono tau faiaiga faamalosi.
Peitai sa matuā tapu ona faailoa soo se faamatalaga e iloa ai lē na molia ma lē na aafia.
