O le manumalo ai o le Toa Samoa i le la fetauiga mataina ma le ‘au a Tonga i le taeao ananafi, ua le fuatasi ai i Samoa le vaaia o tagata lagolago ma si o tatou atunuu foi o faailoa le fiafia e ala i le faalealea o le tagavai o lo tatou atunuu, laeiina o lanu a Samoa ma le faailoa o le fiafia i luga o auala lautele.
E faapea foi nisi o vaaiga ua matauina i Ausetalia, Niu Sila ma isi atunuu o loo iai tagatanuu o Samoa.
O le isi itu mataina i le taaloga o le mafutaga a tama taaalo i le amataga mai o le taaloga ma le taimi o sivatau seia oo lava ina faaiuina le taaloga, o se tulaga ua talanoa ai foi le aufaasalalau faavaomalo o nei taaloga i le tele o le faaaloalo ma le va faale-Pasefika ua atagia ai ma aganuu ma tu a atunuu e lua.
O lea la ua sauni atu le Toa e toe fetaui ma Egelani e manatu nisi o le autapuai a Samoa o le a maua ai ii ma le avanoa e toe maimoa ai le lalolagi i le sao o le taaloga na faia muamua ae poo ai foi o le a sao atu i le sailiga o le siamupini o le taaloga lakapi ma le Ipu o le lalolagi.
