E toatele tagata o le tatou atunuu i Samoa, i latou e lē o ni tagatanuu o Niu Sila, o le a feto’ai ma le sii maualuga o le totogi o visa ulufale i Aotearoa i le amataga o le masina o Oketopa o le tausaga nei.
O lea ua faailoa lautele e le vaega o mataupu tau femalagaa’iga a le malo o Niu Sila tau fou o le a sii iai le totogi o lea auaunaga, e lē gata o visa asiasi lea e toatele o tatou tagata e talosaga iai pe a fia malaga mo ni faalavelave ma nisi o fuafuaga faaleaiga, ae o isi foi ituaiga o visa.
O le taimi nei o le totogi o le visa asiasi e $204 tala ae o le tau fou e $537 tala Samoa.
O le working holiday visa o le totogi o iai nei e $394 tala ae a oo atu i le aso muamua o Oketopa ua $1,056 tala.
O visa mo i latou e fia aooga i Niu Sila poo student visa mai le $591 tala o le totogi o loo iai nei, o le a siitia i le $1,182 tala.
O mafuaaga tau tupe maua e mafai ai ona faagaioi lea auaunaga a le Malo o Niu Sila ua mafua ai le siitaga fou, peitai mo tagata Samoa lava ia, o se siitaga ua faaopoopo i le faigata i le toatele o le faiga fou ua faagaioi ai nei visa, o le talosaga lea e faaaogā ai fesootaiga initaneti le online service.
