O le Aufaipese a le Autalavou a Magele i Sisifo, le aufaipese a le Autalavou PIC i Otara, le aufaipese a le E.F.K.S. Papakura ma le aufaipese o le United Auckland Gospel Choir, o nisi ia o aufaipese o loo aofia i le lisi o aufaipese eseese mai Niu Sila o loo tausinio i tauvaga o pesepesega poo le World Choir Games 2024.
O se polokalame faavaomalo ua mafai ona auai atu ai ma le faitau afe o tagata pepese mai le lalolagi e omai faatasi e faaalia a latou taleni.
Mai aufaipese auai, e 4 faalapotopotoga poo aufaipese mai Aukilani i Saute poo South Auckland na maua le fesoasoani ina ia maua le avanoa e auai ai i lea polokalame faavaomalo.
O nei aufaipese e aofia ai le aufaipese a le Autalavou a Magele i Sisifo, le aufaipese a le Autalavou PIC i Otara, Fatherz and Sonz ma le aufaipese a le Auckland Pasifika Voices.
O se lagolagosua ua faamauina, o se avanoa maoa’e ma lelei mo aufaipese e molimauina ai le eseesega o tapenaga a atunuu eseese e tusa ai ma a latou taumafaiga.
O le tausaga lenei ua faamauina o se taimi muamua lea ua talimalo ai Niu Sila i lea polokalame tele, ma i talaaga o lenei tauvaga, e silia ma le 11,000 tagata pepese mai le 30 o atunuu o loo i le atunuu mo lea tauvaga.
E lē gata ina faaalia ai le mata’ina o tapenapenaga a aufaipese mai atunuu eseese ae o loo faaalia ai foi nisi o faafiafiaga faaleaganuu, e pei ona iai Fiti, Tonga ma isi atunuu o le Pasefika e aofia ai ma Samoa, e pei ona faafiafia ma auai atu ai le Sau E Siva Creatives.
E 25 nofoaga o loo faatino ai le tele o polokalame o lenei tauvaga tele e aofia ai, Spark Arena, Auckland Town Hall, Sky Tower, New Lynn Community Centre.
E 10 aso o lenei tauvaga ma na amata mai le aso 10 o Iulai seia paia le aso 20 o le masina.
