Maitauina le faatupula’ia o le numera o alo ma tamafanau a Samoa ua maua avanoa e taaalo ai mo nisi o ‘au aupito i maualuga i le lalolagi poo le tier 1, e pei ona iai le ‘au a le All Blacks i Niu Sila nei ma le ‘au tele a Ausetalia le Wallabies.

O le afiafi o le Aso Gafua na faalauiloa aloa’ia ai e le faiaogaulu o le All Blacks lana uluai ‘au mo lenei tausaga 2024, ia Scott Robinson poo Razor e pei ona silafia ai e le toatele.  

Ma i lea lisi e to’asefulu alii Samoa na faamanuiaina, ua maua avanoa e taaalo ai mo le ‘au a Niu Sila.

E pei ona aofia ai:

1. Pactrick Tuipulotu 

2. Mark Tele’a 

3. Delton Papali’i  

4. Ardie Savea 

5. Asafo Aumua 

6. Stephen Perofeta  

7. Reiko Ioane 

8. Anton Leienert-Brown 

9. Calab Clarke 

10. Wallace Sititi 

Ae o le ‘au a Ausetalia le Wallabies na faamauina o le Aso Faraile o le vaiaso ua tuana’i atu na faalauiloa aloa’ia ai sui o le ‘au taaalo ma e toafitu (7) tama Samoa o loo ‘aifilofilo i lenei ‘au tele.

E aofia ai:

1. Allan Alalatoa  

2. Alex Hodgman 

3. Noah Lolesio 

4. Hunter Paisami 

5. Len Ikitau 

6. David Feliua’i ma; 

7. Lukhan Salakaia-Loto 

I le maitau ai i le tele o faamatalaga luga o upega tafailagi, ua maitau ai le mitamita o le toatele i le vaavaai atu i le faatupula’ia o le numera o alo ma fanau o Samoa ua maua nei avanoa, faapea nisi o avanoa lē aumaua, ma ua molimauina ai foi le telē o le agavaa o loo iai i tamafanau e avea ai ma sui o ‘au a le All Blacks ma le Wallabies.

O nei alo o nisi foi sa faapena ona tausinio i le taamilosaga o le Super Rugby Pacific lea faato’ā mae’a atu le su’egasiamupini i le faai’uga o le vaiaso na te’a nei.