E to’atasi si tamā ua maliu ma le faitau afe o tagata ua motusia mai le eletise mai o latou fale e oo mai i le taimi nei i le setete o Niu Sa Uelese ona o aafiaga o uiga loulouā o le tau i le afiafi ananafi ma faasolo mai i le po anapo.
O le tele o tagata na molimau i talafou faato’ā vaai lea i se tulaga ogaoga faapea o uiga loulouā o le tau, e lē gata i le malosi o uila ma faititili, timuga aemaise foi le matagi ma le timu aisa i isi faaitu.
Ua faagasolo nei galuega faamamā mai faaitu na aafia, e mamafa lava aafiaga i Sini, Newcastle ma Wolongong.
O le lipoti aupito lata mai ua ta’ua ai e le SES e 2,250 valaau mo se fesoasoani na faaoo atu i le po anapo e mātele lava i laau ma uaea eletise ua to’ulu ma fale ua faaleagaina.
O vaega na aupito malosi ai uiga loulouā o le tau e aofia ai le ogatotonu o Sini, Hornsby ma Karinga.
Faailoa e le Ausgrid i le vaai atu i le faaletonu ua alia’e mai e lē taumate mo nisi o le a oo atu lava i le aso a taeao e le’i ola atu iai le eletise ona o le telē o le galuega e fia faia.
O si tamā ua maliu e talitonuina pe lata i le 80 tausaga, na pa’ū iai le laau i luga o lana taavale i le afiafi ananafi i Cowra, fai mai leoleo e taunuu atu ua maliu.
E to’afā isi tagata na manunu’a ona o le malosi o le matagi i Wagga Wagga.
Puna o Faamatalaga: https://www.9news.com.au/national/queensland-weather-updates-residents-assess-the-damage-after-massive-hail-falls/4cbde6a6-8a17-4818-999d-db902ef637b2
