Ua faaopoopo le numela o le itupa o tamaitai i le laulau o faamasino o le Faamasinoga o Fanua ma Suafa a le atunuu, ina ua mae’a ona sa’ili ni faamasino mo lea faamasinoga tāua a Samoa.

E to’atasi le tamaitai o loo tauaveina lea tofiga i le taimi nei ina ua mālōlō litaea nisi o tamaitai sa avea ma faamasino o lea faamasinoga.

Ua faamaonia mai e le Ofisa Sili o le pulega o le Matāgaluega o Faamasinoga ma le Faafoeina o Galuega Tau Faamasinoga, le susuga Papalii John Taimalelagi Afele, e to’afā faamasino ua filifilia e aofia ai tamaitai e to’alua.

O le afioga Pesetatamalelagi Malouamaua Afoa Arasi Tiotio, o le afioga Fonoti Michelene Taua’a, afioga Leugamata Meleisea Faletolu Lofipo, ma le afioga Telea Uuga Matale Kamu Tapuai Taveuveu Potogi.

O le afioga Telea ma Leugamata o ni tamalii e filifilia nei e avea ma faamasino o loo auauna ma tautua i le Matāgaluega o Faamasinoga ma le Faafoeina o Galuega Tau Faamasinoga, ae sa tautua foi i nisi o matāgaluega a le malo.

O le afioga i le tamaitai faamasino ia Fonoti Michelene Taua’a sa galue i le tele o tausaga mo le kamupani vaalele a Samoa le Polenisia lea ua igoa nei o le Samoa Airways.

Sa faapea foi ona galue i le ofisa o le Komesina Maualuga o le malo Ausetalia i Apia, ae o le tamaitai faamasino le afioga Pesetatamalelagi Malouamaua Afoa Arasi Tiotio, sa tele tausaga na galue ma tautua ai i le malo lea sa avea ai ma Ofisa Sili o le Faalapotopotoga o eleele a Samoa le Samoa Land Corporation.

O le aso 17 o le masina fou o Aperila e faatauto ai faamasino fou ua filifilia.