E toalua ni alo o Samoa i Niu Sila nei, o ni fanau ua o la mauaina le faailoga taualoa mo le ata tifaga maoa’e o le tausaga 2024 poo le Best Film i le Alofa Films Awards.
O le tasi o fanau e igoa ia Vatau Sagaga e 11 tausaga ma lona tausoga ia Alaifatu Fraser Fatialofa 13 tausaga, na o la tuu faatasia se ata tifaga ua faaigoaina A Different Awakening.
Na ta’ua i se pepa o faamatalaga na faamauina ai o le uluai poloketi lea ua galulue ai nei fanau talavou ma le naunautaiga e faaali ma faasoa le tāua o le tomai ma agavaa o tatou tuaa i augatupulaga o lenei vaitau.
I le ata tifaga a ia fanau talavou o loo faaalia ai nisi o faafitauli na feagai ma le toatele o tagata Pasefika aemaise tagata Samoa i le vaitau o le Dawn Raids.
Sa faailo le telē o le sao o la aiga i le tau tuufaatasia o le ata tifaga, ma na o la faaalia ai lo la agaga faafetai i o la aiga mo le fesoasoani i le taumafaiga o le la ata tifaga.
O le masina o Aperila na faatautaia ai le Alofa awards, ma e oo atu i le to’a 60 fanauaoga e 17 mai Ueligitone na auai i le tauvaga i lona vaega ua ta’ua o le regional Pasifika Youth Short Film Competition.
Māua i faamatalaga o le manumalo ai o nei alo, ua faaosofia ai le naunautaiga ma lo la finau e faaauau ona o la tuufaatasia ata tifaga ma amata ai sa laua youtube channel ua faaigoaina o le Panikeke Productions auā le tuu atu ai i luga o a la galuega.
