E to’alima tagata o loo sailia i ni faiga taufaasese ua lipotia mai i Melepone ua o latou lapata’ia ai tagata i ni agaga.
E talitonu le ausu’esu’e pei ona ta’ua e le 9News, o le to’alima lea e aofia ai tamaitai e to’atolu ma ni alii se to’alua latou te afea tagata aemaise lava tinā matutua i auala ma fai iai o loo iai ni agaga o loo taumulimuli ia i latou ma o loo iai tagata o o latou aiga o loo i ni tulaga lamatia.
Ua lipotia e ofo atu le latou fesoasoani i ia tagata e ala i le tatalo mo i latou ina ia alu ese ia agaga, ae fai le tatalo i le to’alima lea i ato a nai tagata ma le faaupuga ia aua ne’i toe tilotilo ia latou ato mo sina taimi.
O le taimi e siaki ai a latou ato, ua iloa ai ua toesea tupe ma nisi mea tāua ma o mataupu ia ua faia nei iai su’esu’ega a leoleo.
Fai mai e silia ma le $150 afe tupe a tagata ua ma’umau ai ma ua faamatuu mai ai e leoleo ata o nisi o i latou o loo sa’ilia ma talosagaina soo se tasi e silafia ni faamatalaga ia i latou ia ina ia vili vave le crimestoppers 1800 333 000.
Puna o Faamatalaga: https://www.9news.com.au/national/alleged-scammers-sought-over-150000-dollar-scam-involving-spirit-warnings/f15be8d7-a61d-4358-bc9b-187e31a4deb0
