O loo faaauau pea ona sau i lalo le fuainumera o fanau Niu Sila e pasi suega o le NCEA.
O le tala faanoanoa lea na faailoa mai e le matagaluega o aoga a o faailoa mai ai foi e na o le ‘afa o fanau aoga tulagalua ma aoga maualuluga lea na faamalolosi i aoga i aso uma o le kuata 4 o le 2022 poo le lē silia atu foi ma le tasi le aso e lē aoga ai.
Ua faamaonia ai e le NZ Qualifications Authority o loo faaauau pea ona aafia aoga ona o le Koviti.
O fanau Pasefika ma Maori lea e le gata o loo tele ina misi aso aoga, ae faapea ai ma le faaauau pea ona maualalo maka o taumafaiga mai suega nei a le NCEA.
Ua iai foi le popolega o le taugata tele o le soifuaga ua iai ua avea foi lea ma itu ua filifili ai nisi o fanau e tuua aoga ae o e faigaluega e lagolago ai matua.
I le sau o le lipoti faanoanoa lenei o le NCEA o le 2022, ua fai mai ai le taitaifono o le Secondary Principal’s Council, o Kate Gainsford, e le tatau ona toe faaluaina le tausaga ua alu.
