O le faauluuluga aoao o le malosi tau i le puipuiga o le Malo ma le atunuu o Niu Sila o Air Marshall Tony Davies na tauaaoina atu pine e faamauina ai le amana’ia e Niu Sila o le galuega fesoasoani na faatino e nisi o tagata ma auaunaga e pei o leoleo ma le vaega o le tineimu ma galuega lavea’i i taimi o faalavelave faafuase’i, lea na faasaoina uma ai ola ma soifua o seila ma le auvaa atoa o le vaa su’esu’e o le HMNZS Manawanui.
O se tasi o tama talavou o le atunuu e faigaluega i le pisinisi tulisi o le Sataoa Beach Fales le susuga Lui Nifo, na aofia iai latou na ave iai lea faaaloalo, ona o ia le tagata muamua na ia faia le galuega fesoasoani na mafai ona ave ai i uta i le pa’u mātū se tamaitai o le auvaa o le Manawanui sa moomia vave se fesoasoani i le po o le Aso Toonai le aso 5 o Oketopa na pa’ulia ai le vaa su’esu’e i gataifale i Saute o le motu o Upolu.
O se vaa pa’u e ta’ua o le kayak na alo e Lui i le nofoaga na pa’ulia ai le vaa ma ofoina ai lana fesoasoani na te ave i le pa’u mātūv le tagata muamua o le auvaa.
Na faaalia foi e Lui Nifo o le amana’ia o lana fesoasoani e ala i le pine ua ia maua faatasi ai ma se faafetai tusitusia mai le pulega o le puipuiga a Niu Sila, ua ave ai sana talosaga i se fesoasoani mo ia ma lona aiga i le taumafaiga o o latou pepa nofomau i Niu Sila i le quota lea ua faamanuiaina i le se’i.
Le susuga Lui Nifo o le tagata muamua na oo i le ogasami na pa’ulia ai le Manawanui lea ua goto, ma ofo iai lana galuega fesoasoani.
O isi na tauaao iai pine ma faafetai tusitusia mai le pulega o le puipuiga a Niu Sila, o se alii fitafita o le sami o le malo Ausetalia e faamautū i Samoa, ona o ia lea na taunuu iai fesoota’iga mo le faia o galuega e maua ai se fesoasoani.
Na maua foi e le matagaluega o leoleo falepuipui ma le toe fuata’ina lea faaaloalo ona o le galuega lavea’i a le vaaleoleo o le Nafanua III, faapea le pulega o le tineimu ma faalavelave faafuase’i.
O se vaa foi o le fitafita a le malo o Farani sa ofoina le fesoasoani mo le Manawanui na ave foi iai le faaaloalo e ala i se pine ma le faafetai tusitusia.
