Ua teena e sui faipule ua faamavae mai le pati faaupufai na tauva ai i le palota tele o le tausaga e 2021, le tofa Ale Vena Ale, Tuu’u Anasii Leota, ma Mau’u Siaosi Puepuemai e ala i le latou loia, le talosaga a le vaega faaupufai e puipuia aiātatau a tagata poo le HRPP, ua fia avea ai ma se tasi o itu auai i lo latou faamasinoga, o le a suesue ai pe ua tatau ona toe foi e fai a latou palota laiti ona ua soli aiaiga o le Tulafono o Faigapalota.
O le aso 20 o le masina fou o Aperila ua faatulaga e le faamasinoga sili e suesue ai le talosaga ona maua ai lea o se tali pe talia le auai o le vaega e puipuia aiātatau a tagata i le suesueina o le mataupu.
O mafuaaga o le teena e sui faipule ua faamavae ma le HRPP ae mananao e avea ma sui tutoatasi, o le a folasia i le aso ua atofaina e suesue ai le talosaga.
