E tele isi fesili ua tulai mai nei I le umi ona nofo vaavaaia o le alii faatupu faalavelave ua maliu nei, ae leai se faaiuga tatau na vave faia iai

E le I mafai ona vave faailoa le suafa o le tagata faatupu faalavelave I le afiafi o le Aso Faraile na sau ai tala I tua ona o nisi o puipuiga faaletulafono

Ma o puipuiga foi nei na taotaomia ma faatuai ai ona toe tipoti e ui o lea na faalua ona tuuina atu iai tusi tipoti mai le 2019

Mai ia Aperila 2019 na apili ai e le ua maliu le toe tipoti o ia, e oo mai I le taimi o le faalavelave e le I maua lava se faaiuga e tipoti ai ona o le feteenai ma nisi o puipuiga faaletulafono e agavaa ai lea alii I lalo o tulafono o femalagaiga o ia o se protected person, poo se tasi e tatau ona puipuia ma e ono faafaigata ai ona taofia pe tipoti foi

Ese mai la I fesili o le faatuai ona tipoti,

O lea foi na sao lana alu I Samoa I le 2016 e ui o lea sa nofo vaavaaia I lea taimi

O Novema I le 2016 na faimalaga ai Ahamed Aathil Mohamed Samsudeen, ma e malaga ua leva ona pipii lona igoa I le lisi o tagata terorisi o loo tulimataia e leoleo a Niu Sila

O le malaga lea I Samoa na foi mai loa ae toe taumafai e faimalaga ese atu I le lima masina mulimuli ane ae taofia loa I le malaevaalele I Aukilani

I ripoti a le Newshub, ua fesiligia ai nei ma vaega suesue faalilolilo a Niu Sila, pe latou te le I faailoaina ia Samoa o lea o le a asia e Samsudeen ona laufanau

O le aso o le a saga auiliili ai e le kapeneta le talaaga o lea alii terorisi, aemaise lava le toe iloilo o le tulafono o loo limataitaiina ai mataupu fesootai ma faiga terorisi.