A o lumanai ai le fonotaga a le APEC ua fuafua mo San Francisco i le vaiaso nei sa feagai ai le Palemia o Ausetalia ma ni faaseā faasaga ia te ia e faapea ua ia faamuamua ana faigamalaga faavaomalo nai lo le foia o nisi o mataupu o loo tutupu i lona lotoifale.
O nisi o taumafaiga a le soofaatasi e faaigoa Albanese o le Airbus Albo na amata i ni nai vaiaso talu ona mae’a le palota o le 2022 a o sauni ai le Palemia mo lana faigamalaga atu i atunuu i fafo.
O lana malaga la i le fonotaga lea a le APEC o le lona 18 lea o ana faigamalaga faavaomalo talu ona avea o ia ma Palemia ia Me o le tausaga talu ai.
O le tau aofai o ia faigamalaga mo le au totogi lafoga o se vaegatupe tele e pei ona ta’ua i tusitusiga.
I se finagalo faaalia o se alii polofesa mai le Iunivesite o Melepone i le mataupu lea na ia ta’ua ai o le malaga o se Palemia o se atunuu i valaaulia ia faavaomalo o se vaega o lana konekarate ma e tāua tele i le va o Ausetalia ma atunuu i fafo.
Na faailoa foi e lea alii polofesa o Michael Wesley o faitioga foi e faatatau i Palemia ma a latou malaga faavaomalo e lē o se mea fou ma sa tupu foi i isi Palemia ua tuanai.
