Ua faailoa lautele e le Matagaluega o le Soifua Maloloina le taoto ai nei o se tapenaga mo le toe faaleleia atoa o le nofoaga autu o loo iai le maota gasegase o Tupua Tamasese Meaole, ma le ofisa tutotonu o le matagaluega, ina ua tali le pulega o le matagaluega i se lipoti a le nusipepa o le Samoa Observer o loo fofola matilatila mai ai le tele o faaletonu o loo vaaia i le falemai i Motootua, e amata mai i moega ma isi masini o loo togafiti ai gasegase, e oo lava i le ea malulu ma faleui faapea fale taele o loo faaaoga e gasegase.
O ia foi faaletonu ua faaalia e le matagaluega i se pepa o faamatagalaga faalauaitele, e le misi se aso ma tulai mai ona o nisi lava o o tatou tagata ua leai se mafaufau alofa, ae ua latou faaleaga ia meatotino.
Pe a agai lo tatou atunuu i lea falemai ona latou molimauina lea o ia faaletonu.
Ua silia i le sefulu tausaga o le falemai na fausia i se fesoasoani a le Malo o Saina, ma o le taimi nei ua tele ina faaletonu nisi o totoga o le falemai e pei ona vaaia i nisi vaega o le fā’alo ua leaga, ma nisi vaega o loo tutulu.
Ua faailoa e le matagaluega o loo faia pea galuega mai lea taimi i lea taimi e fonofono ai nisi o faaletonu, ae o loo tāpā foi ni fesoasoani mai fafo mo le faaleleia o nisi vaega.
