Ua ta’utino se tamā mai Kuiniselani sa miti i ana numera o le Lotto ua sau uma i le se’i ae vili atu loa ma le pulega o le taaloga o ia lea ua malo i le faailoga e $60 miliona.
O lē ua manumālō e mai Bribie Island i Kuiniselani e na o ia ua faamanuiaina i le faailoga muamua o le powerball i le po anapo.
Fai mai lana faamatalaga i le ABC faato’ā aga’i atu lava e faia sana mālōlōga ae tatagi atu ma le telefoni e logo atu ai lona mālō.
Na ia faamatala ai o nai vaiaso ua tuana’i sa fai ai lana miti o le la pepa ma se tasi o ana uo ua mālō i le 40 miliona, ma talu mai lava le taimi lea e ova loa ma le 40 miliona se faailoga o le Lotto, faatau loa a la pepa o le taaloga ma o ana numera masani lava ua 15 tausaga o ave i le Lotto.
Fai mai a ia o le a faaaogā lana mālō e fesoasoani ai i nisi o ona aiga ma faatau sana taavale fou ma le anoano o isi ona mana’oga ua leva ona moemiti ai e faatino pe a manuia i le taaloga lea la ua taunuu i le vaiaso nei.
O le 2 ai lenei o faailoga tetele o le Lotto ua manumālōina i totonu o le vaiaso e tasi, o le 100 miliona i le Aso Lua ma le 60 miliona mai le po anapo.
Puna o Faamatalaga: https://www.9news.com.au/national/powerball-win-queensland-man-60-million-prize-money-dreaming-about-his-lotto-numbers/e66db556-dafa-48eb-8dea-27217a682318
