O pisinisi i tua e pei o fale’aiga sa saunia taumafa mo gasegase e taofia i le falema’i o Malietoa Tanumafili II i Tuasivi, e pei ona faailoa e le Minisita o le Matagaluega o le Soifua Mālōlōina i le tatalaina o le galuega o le tunoa poo le umukuka e gasese ai taumafa mo gasegase i lea falema’i autū o le atunuu i le motu i Savaii.

O se miti a le Malo ua taunuu auā sa tapena i ni tausaga ua tuanai a o lea ua tino mai, ma o le a faasaoina ai tupe alu a le matagaluega, ae o le a sili ona tāua auā o le a gasese ai taumafa e saogalemu mo le soifua lelei o gasegase.

O le amataga o le vaiaso na tatala ai lea galuega na faatupe lava i seleni faasao a le matagaluega o le soifua mālōlōina i le tau e tasi le miliona 4 selau afe tala.

O le autū na fausia ai lava se tunoa mo le maota gasegase i Tuasivi e pei ona faailoa e le minisita le afioga Valasi Luapitofanua Toogamaga Tafito Selesele, i lana saunoaga na tatala aloa’ia ai le galuega, o le tapena lava lea e le matagaluega o tagata faigaluega faapitoa ua iai tomai ma agavaa e faatino le gaseseina o taumafa.

O i latou ia e aofia ai le aukuka ma tagata e fesoasoani aemaise o i latou e iai tomai faapitoa i taumafa paleni ma taumafa tatau mo le soifua mālōlōina o le gasegase.

Ua talitonu le minisita o ia galuega uma ua faatino e le malo, e mo le lelei ma le manuia o tagata uma o le tatou atunuu aemaise ua saga siitia ai le auaunaga tau soifua mālōlōina i lo tatou atunuu atoa.