O loo su’esu’e nei e leoleo i se mataupu na lipotia faato’ai atu i le ofisa i le Aso Gafua, ina ua taumafai se tagata e ave faamalosi se tamaitiiti e 9 tausaga le matua, i fafo atu lava o le a’oga a le Rowandale i Manurewa.
E le’i manuia taumafaiga a lē na tau ave faamalosi le tamaitiiti ina ua aga’i ane nisi o mātua e taofi faiga faasolitulafono a lenei tagata.
O loo faamauina i lipoti mai le 1News, o se alii na faia lea gaioiga, ma na vave ona sola ese o ia i lana taavale ina ua māua e mātua ana taumafaiga.
I se faatalatalanoaga ma le Ulu A’oga o le a’oga a Rowendale, Karl Vasau, na ia faamaonia ai o loo saogalemu le tamaitiiti ma o loo mālōlōina lelei ma o loo faatasi atu ma ona mātua.
Ae na faamatala e le Ulu A’oga, o lona faanoanoaga i lenei matāupu, o se taimi muamua lava lea ua tuu iai e mātua o lenei tamaitiiti le faatagana e na te savali atu ai i le fale na o ia, peita’i ua fetaia’i ma lenei faafitauli, semanū a tula’i mai ai se faalavelave.
I le oo atu o le tamaitiiti i le fale ma faamatala le mea na tupu i ona mātua, na iloa ai lea matāupu ma aga’i ane ai loa mātua i le a’oga ma faafesoota’i ai loa e faia’oga leoleo.
O loo faasolo nei su’esu’ega a leoleo i lea mataupu, ma ua faamauina ai foi le faaopoopo ai o leoleo e aga’i i petolō ma mata’itūina lea faaitu auā le saogalemu o fanauiti ma tagata lautele.
Ua fautuaina foi le mamalu lautele e silafia pe iloa foi ni faamatalaga e tusa ai ma lea matāupu, ina ia faafesoota’i le ofisa o leoleo i le numera 105.
Puna o Faamatalaga: https://www.1news.co.nz/2025/05/07/school-abduction-attempt-boy-9-walking-home-alone-for-first-time/
