Ua ova tele le taugata o le tau o le suauu i Thames i Coromandel pe a faatusa i isi nuu tuaoi, ma ua fai mai ai tagata Thames o le gaoi.
O le va o le $2.91 sene i le lita ma le $2.96 sene i le lita mo le penisini 91 lea e oo mai ananafi o iai, tusa lea e i le va o le 20 – 30 sene i le lita e taugata atu ai na i lo Tairua lea e $2.69 sene i le lita.
Na lipotia e le Herald e toatele tagata Thames e lē o toe faaaogāina pamu penisini i totonu o Thames ae o lea ua o agai i pamu penisini i fafo atu o le aai e utu ai taavale.
O lea foi ua faatalosaga faalauaitele e se tasi o tagata Thames i luga o le Facebook pulega o pamu penisini nei e faamalamalama mai le mafuaaga o le soona taugata o le penisini pe a faatusa i isi nuu tuaoi.
E 4 pamu penisini o loo iai nei i Thames, o le BP, 2 Mopili ma le Gull, ma e oo mai ananafi o le va o le $2.91 ma le $2.96 i le lita mo le penisini 91, ma tusa lea e 30 sene e taugata atu ai na i lo le tele o pamu penisini o loo faatauina le 91 i le tele o vaega o Niu Sila.
Ae i se tali mai pamu penisini i Thames i luga o tala a le leitio a Niu Sila, ua fai mai le BP e tele itu e aafia ai le tau o le penisini ma o loo iloilo lava i aso taitasi.
E leai se tali mai pamu penisini a le Gull faapea le Mopili.
Puna o Faamatalaga: https://www.nzherald.co.nz/nz/thames-residents-fed-up-with-ridiculous-fuel-prices-its-just-plain-theft/Q6USULMAGZBJDNDL3NQ336XXKI
