E lē fou i le faafofoga ma le faalogo a le atunuu le afea i saunoaga a sui faipule o le Palemene, e lē gata o le paeaiga o iai nei ae o paeaiga ua mavae, le pese masani e faasino i le taugata o le soifuaga aemaise o le tau o oloa e manaomia e tagata i aso taitasi.
O le tala faatatau o le tupe fou ua fili tagaga nei iai finagalo o sui usufono o itumalo faapalota e 51, o loo faalogoina ai le pese lava i le taugata o le soifuaga, ma o se pese e logo lelei i le taaloga faapolokiki auā e sufi a’i loto o tagata o latou e faia le filifiliga pe a oo i taimi e filifili ai sui o itumalo i le fono usu a Samoa
O le faipule o Satupaitea o se tasi sa avea ma minisita o le kapeneta ua lava lona silafia i le faagaioia o tala o tupe a faigamalo. O lana saunoaga e lē gata ina faatupu manatu ae o loo afifi ai i totonu fautuaga i le faigamalo i se auala e mafai ona pa’u ai le tau o le soifuaga.
O lea vaega o le saunoaga faalauaitele i le tala faatatau autu o le tupe a le sui faipule o Satupaitea le afioga Lautafi Fio Selafi Purcell, na tali iai le Minisita o Faatoaga ma Faiga Faiva le susuga Laauli Leuatea Polataivao Fosi Schmidt, faapea le Minisita o Puna’oa Faalenatura ma Siosiomaga le afioga Toeolesulusulu Cedric Schuster.
O finagalo faauilavea mai le minisita o faatoaga ma faiga faiva ma le minisita o puna’oa faalenatura ma siosiomaga, na tali ai i le sui faipule o Satupaitea.
O loo faaauau pea le talanoaina o le tala faatatau o le tupe mo le tausaga faaletupe 2024/2025.
