Ua faai’uina lenei tausaga o a’oa’oga mo fanau a le atunuu e pei ona faia laugatogi ma faauuga, e pei ona molimauina ai le laufofoga fiafia o fanau ma mātua ua i’u manuia le taumafai, ae o isi ua toe sauni e faaauau le olaga a’oa’oina ma toe silasila poo ā vaega ua faaletonu ai le taumafai o lenei tausaga.

E lē gata i fanau a’oga ae o lea foi ua faai’uina le taumafai o nisi o le aufaipisinisi laiti sa feagai ma ni a’oa’oga e faalautele ai lo latou silafia i le faatinoina o se pisinisi.

Ua faailoa i auala o faasalalauga a le malo le 44 o alii ma tamaitai ua faauu i le Tusipasi Laasaga II poo le Certificate Level II ua aloa’ia e le pulega o tusipasi ma faailoga a le malo, ma ua agavaa ai i le faafoeina o ni taumafaiga faapisinisi.

O se taumafaiga lenei sa galulue faatasi ai le vaega o feagai ma polokalame i le atina’eina o pisinisi tuma’oti le Samoa Business Hub ma nisi o matagaluega a le malo.

E ono masina sa feagai ai le to’a 44 ua faauu ma a’oa’oga ma ua ausia ai e i latou se isi laasaga maualuga e fesoasoani ai i le latou galuega o le faafoeina o pisinisi laiti.

O le Koluse Mūmū, matagaluega o leoleo, falepuipui ma le toefuata’iga, matagaluega o tiute ma tupe maua ma le matagaluega o pisinisi alamanuia ma leipa sa galulue faatasi ma le Samoa Business Hub i le faafoeina o le a’oa’oga mo i latou ua faauu ma maua Tusipasi o le Laasaga II.

O Ianuari o le tausaga fou e amata ai le isi a’oa’oga e pei ona amata ai nei ona talia lesitala o i latou e fia auai i le a’oa’oga mo le tausaga a sau 2025.