E lē tasi se atunuu ua lapataia Isaraelu e tusa ma ana fuafuaga o le a ia osofaia le taulaga i Saute o Gaza, Rafah, poo le nofoaga o loo faaofiofi ai tagata sulufai Palesitina.
Na faamaonia mai e le sui o le faigamalo a Peretania o le silia ma le ‘afa o tagata Gaza o lea o loo nonofo i Rafah ma i nisi o lipoti pe ā ma le 1.5 miliona tagata Palesitina o loo nonofo ai ma o le toatele o loo nonofo i faleie.
E oo lava foi ia Amerika o lea ua ia lapataia Isaraelu, faatasi ai ma Malo Aufaatasi, o le Iuni a Europa faapea ma Niu Sila, e tauala atu i le minisita o le va i fafo, Winston Peters.
O le faaiuga o le vaiaso na saunoa ai le Palemia o Isaraelu e osofai uma tagata Hamas e oo lava i Rafah, ae ia aveese muamua tagata civilians poo i latou e lē o aofia i le taua.
Peitai ua lipotia e lē o tagata uma e mafai ona aveesea mai le aai lea o loo i le tuaoi ma Aikupito.
E foliga mai e lē o foi lava le Palemia o Isaraelu e ui i le toatele o taitai o malo ua faaalia le popole i le fuafuaga ua faailoa mai.
E ese mai le osofaia o Rafah ua fuafua nei, o lea foi ua teena e le Palemia o Isaraelu le talosaga a le Hamas lea na tuuina mai e taofi pomu ma osofaiga.
