O loo taoto nei i le falema’i i Motootua se tagata o loo iai i se tulaga tigaina, ae o loo tau saili poo ai sona aiga poo se tagata e sootaga vavalalata i lenei tagata.
O luga o le itulau o le facebook o loo faailoa ai e le Ofisa Sili o le Soifua Mālōlōina se faasilasilaga o loo tau saili ai le aiga o sia tagata, e faapea na ave atu e leoleo i le falema’i i le tolu aso talu ai, i se tulaga e lei malamalama (unconscious).
O lenei tagata o se alii, pe ā ma e 50 i le 55 tausaga le matua o lona soifua.
O le faamatalaina o ona foliga, e seea uliuli lona lauulu, e fai lana ‘ava (beard), e eena ona mata, e tā lana pe’a taulima (tattoo armband) i lona lima agavale.
E i se mea o le 60 i le 70 kilokalama lona mamafa.
I le aso na avatu ai e leoleo lenei alii i le falema’i, o loo ta’ua faapea sa ia ofuina se mitiafu fou lanu meamata ma se ofuvae vaepupuu lanu moana.
E lē o faailoa maia se ata o lenei alii ona o le puipuiga i le tulaga o mataupu faalilolilo, ae o loo faailoa mai le numera a le alii foma’i e mafai ona faafesoota’i atu iai pe afai e silafia e se tasi se aiga o loo tau sailia so latou tagata, ae ono fetaui i ai foliga o loo faamatala atu i luga.
Faafesoota’i le alii foma’i o Dr Atoa Glen Fatupaito i le 7676143.
