E 7 aso ua tuu atu e le Komiti o ava malosi i pisinisi o loo gaosia le pia ma isi mea inu malosi e faailoa atu ai pe o latou mulimulitaia aiaiga o le tulafono e gaosia ai le ava malosi i totonu o Samoa. 

O le mafuaaga lea o le taofia o le faatau i le atunuu o nisi o pia e pei o le Taula Strong, Vailima Lager Export ma nisi o mea inu malosi ua uma ona sui ma fagu malosi vodka ina ua toe tatala le faatau i le atunuu o lea oloa ina ua iai suiga o vavao Koviti-19 na amata i le Aso Lulu o lenei vaiaso. 

Sa fesiligia le taitaifono o le Komiti o Ava Malosi le afioga i le Minisita o Tupe Maua le afioga Tuala Tevaga Iosefo Ponifasio i le faia o lea faaiuga ona e iai pisinisi gaosi ava malosi o loo o latou fesiligia le taofia o nisi o a latou pia faapea mea inu malosi ua sui ma fagu malosi vodka o loo gaosia i le atunuu. 

Faaalia e Tuala o le 7 aso lea e ao ai i ia pisinisi ona avatu se faamatalaga e tali ai le sipili e sui ai ia mea inu le ethanol lea na maua i sailiiliga a le nofoaga o suesuega faasaienisi e fai si maualuga o le malosi o loo sui ai ia ituaiga o ava malosi. 

“A maea le 7 aso ona o aiaiga o le tulafono o loo iai le isi avanoa e faatalatalanoa ai, o loo fai mai le tulafono a faapea e le oo i se tulaga faapena ona tuu avanoa lea o le tulafono i o tatou Kamupani gaosi ava malosi. A uma la le 7 aso combined na oo loa lea i le isi laasaga o le auina taitoatasi mai o manufacturers nei, Kamupani nei i luga o le liquor board e faamatala mafuaaga ua ala ai ona lē comply.” 

Ua faamanino foi e Tuala o loo tuu atu pea e le Kapeneta le faatagana i le Liquor board e fai ai suesuega. O isi ava malosi o loo faataga ona faatau e ese mai i vaega o ia oloa o loo faasā pea seia maea suesuega o loo feagai ma le Komiti e pulea le ava malosi.