O le vaiaso o tupulaga talavou i Samoa na amata faamamalu e le Malo i le tausaga e 1993 i le vaitaimi o iai le matagaluega o tupulaga talavou ma taaloga, ae o le tausaga e 2021 na faatoa faamamalu ai e Samoa le aso faavaomalo o tupulaga talavou.
O le faaiuga o le vaiaso na tatala ai e le sui Minisita o le Matagaluega o Tina ma Tamaitai Atina’e o Afioaga ma Agafesootai le vaiaso o tupulaga talavou o lenei tausaga, e pei ona faatāua ai le atina’e o tupulaga o le atunuu.
O le tasi o tamaitai tauva mo le sailia o se Tausala o Samoa o Miracle Afele e iai ona manaoga tumau sa avea ma lauga faapitoa o le tatalaina o lea faamoemoe taua, auā o ia o se tamaitai talavou e ui e iai ona manaoga tumau ae o loo avea nei ma se faiaoga o le gagana faitaga i le aoga o le SENESE o se aoga e faapitoa i le aoaoina oi latou e logonoa ma le mafai ona gagana.
O le afioga i le sui Minisita le tofa Seuamuli Fasi Toma na saunoa e tatala aloaia le vaiaso o tupulaga o Samoa lea o loo faagasolo ona polokalame i le vaiaso nei, o loo faatautaia e le matagaluega o tina ma tamaitai atina’e o afioaga o agafesootai.
Le sui Minisita o Tina ma Tamaitai atinae o afioaga o agafesootai le tofa Seuamuli Fasi Toma i se vaega o lana saunoaga na tatala ai le vaiaso o tupulaga talavou o Samoa mo lenei tausaga 2023.
