O le siitia ai pea o taumafaiga i le toe faafoi o le atina’e o tagata tafafao i se tulaga sili atu ona maualuga ma lelei auā le tautuaina o tulisi e afea lo tatou atunuu, o lea ua faailoa e le pulega o tagata tafafao le tatala ai nei o se isi auaunaga tau faletalimalo ua faaopoopo i isi nofoaga o loo faamautū ai malo tafafao mai fafo, aemaise foi o o tatou lava tagata o loo faaaogāina auaunaga a faletalimalo.
O le Survivor Beach Resorts i Falelatai ua fausia i le nofoaga o loo iai se matafaga tele lauoneone sa pu’e ai le ata o le Survivor a se faletelevise i Amerika.
Ua tatala nei mo malo poo tulisi tafafao ma le lautele o le atunuu e fia faaaogāina lea faletalimalo.
O le taligamalo talu ai nei i le Fono a Malo o le Taupulega na faamautū ai i lea faletalimalo nisi o ta’ita’i o malo ma latou usugafono, ma o se auaunaga ua ta’ua e le pulega o tagata tafafao sa viia ona o le lelei tapena i ona vaega uma.
O le kamupani e ana lea faletalimalo o loo latou pulea ma faagaioia foi le faletalimalo lauiloa o le Rainmaker i Amerika Samoa.
O le tatalaina o le Survivor Beach Resorts ua tatala ai le isi faitoto’a mo avanoa faigaluega.
