O le tele o pisinisi ma fale faigaluega i Vaitele i le nofoaga o loo tumutumu iai le atunuu mo galuega ma pisinisi, ua molimauina ai le siitia o le tautua a le lala o le faletupe o le National of Samoa o loo iai, ona ua mae’a ona umusa ma tatala galuega na toe faafou ai.

O le Aso Gafua o le vaiaso nei 24 o Fepuari 2024 na toe amatalia ai le tautua a lea lala o le faletupe mo tagata lautele aemaise o le aufaipisinisi, ina ua mae’a ona faafou atoa le ofisa ma ua vaaia ai foi ni suiga lelei i lana tautua. 

Ua fai si tele o vaiaso o tapunia lea lala o le National Bank of Samoa a o faagasolo galuega e toe faaleleia ai, peitai ua faailoa e le pulega o se tulaga lelei le mae’a ma toe tatala, ona sa tau savali mamao i le nofoaga tutotonu o le NBS i Apia le toatele mo le talaina ma le teuina o seleni.

Ua faailoa foi e le pulega o lea faletupe, ua fetaui foi le toe tatala o le latou lala i Vaitele ma le mae’a o aoaoga a le aufaigaluega sa aoaoina lelei ai i nisi o suiga o lana auaunaga mo le atunuu.

Sa fesoasoani foi se tasi o auaunaga fou a le faletupe e ala i ana taavale vans ua iai uma masini faaonapo nei mo galuega tau tupe e tautua ai le atunuu a o tapunia le lala i Vaitele.

O le National Bank of Samoa o se tasi o faletupe faapisinisi i lo tatou atunuu, e pei ona iai ma tautua a isi faletupe faapisinisi e pei o le ANZ ma le Samoa Commercial Bank.